കൊച്ചി: ഇയാളെ നിങ്ങള്‍ക്ക് അറിയാമോ? ഒരു പക്ഷേ, ഇത്തരത്തിലൊരു വാട്‌സ്ആപ്പ് മെസേജ് നിങ്ങള്‍ക്കും കിട്ടിയിരിക്കാം. വാട്‌സ് ആപ്പില്‍ വരുന്ന ഇത്തരം ഫോട്ടോകളും സന്ദേശങ്ങളും ഓപ്പണ്‍ ചെയ്യാന്‍ നില്‍ക്കരുതെന്നാണ് സൈബര്‍ പോലീസ് നല്‍കുന്ന മുന്നറിയിപ്പ്. സൈബര്‍ തട്ടിപ്പിന്‍റെ ലേറ്റസ്റ്റ് വേര്‍ഷനായ സ്റ്റെഗ്‌നോഗ്രഫി എന്ന തട്ടിപ്പാണിത്. ഇത്തരം തട്ടിപ്പുകള്‍ സംസ്ഥാനത്ത് വ്യാപകമായ പശ്ചാത്തലത്തിലാണ് പോലീസ് മുന്നറിയിപ്പ് നല്‍കുന്നത്.
ആകാംക്ഷ പണി തരും
ഫോട്ടോ തെളിയാത്തതിനാല്‍ എന്താണെന്ന് അറിയാനുള്ള ആകാംക്ഷയില്‍ ആരും ക്ലിക്ക് ചെയ്യും. ഇങ്ങനെ ചെയ്താല്‍ നിങ്ങളുടെ വാട്‌സാപ്പ് ആദ്യം ഹാക്ക് ചെയ്യപ്പെടും. തുടര്‍ന്ന് നിങ്ങളുടെ ഫോണ്‍ തട്ടിപ്പുകാരന്‍റെ നിയന്ത്രണത്തിലാകും. ബാങ്ക് അക്കൗണ്ടിലെ പണവും നഷ്ടപ്പെട്ടേക്കാം. തട്ടിപ്പുകാരുടെ സോഫ്റ്റ്‌വെയറുകള്‍ ഫോട്ടോകളുടെ മറവില്‍ ഒളിപ്പിച്ചു കടത്തുന്ന രീതിയാണിത്.
പരിചയമില്ലാത്തതോ പരിചയമുള്ളവരുടെയോ നമ്പറുകളില്‍ നിന്ന് ഇത്തരം സന്ദേശങ്ങള്‍ വരാം. നിങ്ങളുടെ പരിചയക്കാരെ ഇത്തരത്തില്‍ പറ്റിച്ച് അവരുടെ വാട്‌സാപ്പ് ഹാക്ക് ചെയ്ത ശേഷമായിരിക്കും സന്ദേശങ്ങള്‍ അയച്ചിട്ടുണ്ടാവുക. ഇതറിയാതെ ക്ലിക്ക് ചെയ്താല്‍ നിങ്ങളുടെ ഫോണ്‍ ഹാക്ക് ചെയ്യപ്പെടും. ഫോണിലെ ബാങ്ക് അക്കൗണ്ട് വിവരങ്ങളടക്കം തട്ടിപ്പുകാരന്‍റെ കൈയിലെത്തുമെന്നും പോലീസ് മുന്നറിയിപ്പിലുണ്ട്. ഇത്തരം തട്ടിപ്പിന് ഇരയായാല്‍ അടുത്തുള്ള പോലീസ് സ്‌റ്റേഷനിലോ ദേശീയ സൈബര്‍ ക്രൈം പോര്‍ട്ടലായ 1930യിലോ പരാതിപ്പെടാം.
